Að sníða sér stakk eftir vexti.

 

Hvort heldur er hægt að sníða sér stakk eftir vexti eða vaxa og fylla út í þann sem við höfum. Nú þegar fráfarandi meirihluti hælir sér á hvert reipi fyrir þann árangur sem náðst hafi í bæjarfjármálum. Þá er ekki úr vegi að líta á í hverju þessu árangur er fólginn. „ Uppsagnir, niðurfellingar, afskriftir, hækkað útsvar". Ekkert af þessu eru nýjir eða stækkaðir tekjustofnar sem nýtast okkur til framtíðar. Látið er að því liggja að Sjálfstæðismenn og óháðir ( hvað sem það nú þýðir að vera óháður í pólitík) séu öðrum fremri í fjármálastjórnun.  Því fer víðs fjarri. Sjálfstæðismenn jafnt og aðrir hafa stýrt fyrirtækjum í gjaldþrot. Þar klikkaði væntanlega fjármálastjórnunin. Eftir 60 ára setu D í meirihluta eða sem svarar einni starfsævi er mál að linni og K-listi bæjarmálafélagsins taki við og sýni það sem í honum býr.

                Nú þegar sótt er að okkur úr öllum áttum og allt á skera niður við trog vegna mannfæðar. Þá er okkur lífsnauðsyn að. „Vaxa upp í stakkinn". Við þurfum fleira fólk til að halda lækninum, reka arðbæra þjónustu, halda uppi okkar sameiginlega rekstri.

Þess vegna vill Bæjarmálafélagið:

• Ráða Atvinnu menningar og markaðsráðgjafa. Sem verði á útkikkinu eftir atvinnu og markaðs tækifærum.
• Endurvekja Atvinnumálaráð. Þessi málaflokkur er svo mikilvægur að hann má ekki vera hornreka .
• Klasasamstarf. Tenging atvinnurekenda getur skapað nýja og oft spennandi hluti, tækifæri.
• Hugmyndasamkeppni. Allir fá hugmyndir í einhverjum mæli. Flestar þeirra detta dauðar niður vegna þess að aðrir sem gætu gert sér mat úr þeim vita ekki af þeim. Einungis brot af þeim hugmyndum sem fæðast gætu orðið að veruleika og skapað tekjur. Þess vegna er mikilvægt að hlúa að þessari frum vinnu og örva hana.
• Nota staðsetningu Bolungarvíkur sem er glæsileg með tilliti til þjónust við Norður-Íshafssiglingaleiðina sem kemur til með að opnast í nálægri framtíð.
• Áætlunarferðir verði gerðar að alvöru valkosti fyrir þá sem sækja atvinnu eða nám á svæðinu. Bæði verð og tíðni ferða þurfa að vera ásættanlegar. Aðgengileg leið fyrir ferðalanga sem hingað vilja komast.
• Alþjóðaflugvöllur verði á Vestfjörðum. Við búum við skekkta samkeppnisaðstöðu vegna þess að við höfum ekki möguleika á beinni tengingu við útlönd.

Síðustu áföll í atvinnumálum  sýna okkur enn betur en áður að nauðsyn er á að dreifa atvinnueggjum okkar í fleiri körfur.  Bæði vegna atvinnuöryggis,  fólksins og eins til þess að jafna út sveiflur í tekjum sveitarfélagsins. Þá er fjölbreytnin ekki síst nauðsynleg til að ungt fólk sem er að byrja sinn feril kjósi að setjast hér að.

Við viljum koma að málum bæjarfélagsins með fólkinu fyrir fólkið.

Framtíðar okkar vegna setjum við x við K  

Arnþór Jónsson 4. maður á lista Bæjarmálafélags Bolungavíkur.

 

Dagskráin framundan!

Ágætu BolvíkingarNú styttist í kosningar!

Stefnuskráin okkar hefur nú verið borin út á öll heimili í bænum og við vonum að allir séu duglegir að kynna sér hana og þau gildi sem Bæjarmálafélagið leggur áherslu á í stjórnun bæjarins

Þriðdagskvöldið 25. maí verður opið hús að vanda og heitt á könnunni – lumar þú á pönnukökum?

Á miðvikudagskvöldið þann 26. maí kl. 20:00 ætla frambjóðendur K- lista, Bæjarmálafélags Bolungarvíkur að sitja fyrir svörum um stefnuskrána og hvetjum við bæjarbúa til að koma og ræða þau mál sem eru þeim hugleikin. Við viljum heyra ykkar sjónarmið svo að hún megi þróast í samræmi við vilja og áherslur bæjarbúa.  

Fimmtudagskvöldið kl. 20:00 tökum við þátt í sameiginlegum framboðsfundi beggja lista og er fundurinn í sal  Ráðhúss Bolungarvíkur. Það verður nú vafalaust spennandi að fylgjast með þeim umræðum eða hvað?Á föstudagskvöldið ætlum við vera skemmtileg og vera með allskonar fyrir ALLA...

Það er helgi við hættum streði - nú er gítar og gleði !!! Frambjóðendur stíga á stokk í bolvísku „Actionary „ Hver þeirra skyldi fá hlutverk á nýja sviðinu í félagsheimilinu!!! Við byrjum kl. 21:00

LAUGARDAGUR...Við ætlum að sjálfsögðu að hafa kosningakaffi á kjördag á kosningaskrifstofunni frá kl. 14:00 - 18:00

Um kvöldið verður svo Kosningavaka frá kl. 19:00 á Höfðastígnum (Kosningaskrifstofunnu) sem byrjar með Eurvision Partýi – og frambjóðendurnir hita að sjálfsögðu upp og taka lagið!!! Síðan hefst spennan – KAUST ÞÚ RÉTT!

Staðardagskrá 21 og matjurtagarðar í Bolungarvík

Eitt af því sem Bæjarmálafélagið leggur áherslu á er að Bolungarvíkurbær geri áætlun um Staðardagskrá 21.  Staðardagskrá 21 er áætlun um verkefni innan sveitarfélaga til að komast í sjálfbæra þróun á 21. öldinni. Sjálfbær þróun felur í sér að endurnýjanlegar auðlindir séu hagnýttar á þann máta að ekki sé gengið á höfustólinn og auðlindin haldi óskertu gildi sínu til frambúðar. Þetta felur einnig í sér að nýting auðlindanna, stjórnun fjárfestinga, tækniþróun og breytingar á stjórnkerfum aðlagi sig bæði að þörfum nútímans og framtíðarinnar. Hugmyndin með Staðardagskrá 21 er sú að að samfélagið geri áætlun um þau verk sem vinna þarf í hverju sveitarfélagi um sig til að nálgast markmiðið um sjálfbæra þróun  þ.e.a.s. þróun sem tryggir komandi kynslóðum viðunandi lífsskilyrði. Áætlunin snýst ekki eingöngu um umhverfismál í venjulegum skilningi, heldur er henni ætlað að taka jafnframt tillit til efnahagslegra og félagslegra þátta s.s. að tryggja öryggi og frumþarfir íbúa, t.d. með því að vera sjálfbjarga um matvæli, tryggja jafnræði íbúa, þátttöku þeirra í mótun samfélagins o.fl. en einnig að þróa markaði og stefna á hámörkun arðsemi og aukningu hagvaxtar með nýtingu án þess þó að það gangi á náttúrugæði til framtíðar Segja má að Staðardagskrá byrji inn á heimilum íbúa t.d. með því að endurnýta það sem hægt er, sóa ekki orku að óþarfa, fara sparlega með hreinsiefni og hagnýta þær auðlindir og gæði sem náttúran býr yfir svo við getum verið sjálfum okkur nóg eða leiða til betri nýtingar á gæðum og bæta lífskjör. En Staðardagskrá leggur líka ábyrgð á sveitarfélagið til að móta áætlanir og lausnir m.a. á úrgangsvanda samfélagsins á vistvænan hátt, skapa aðstöðu fyrir íbúa til að geta nýtt það sem í samfélaginu er til að bæta kjör, skapa atvinnu og auka hagvöxt með hliðsjóð af sjálfbærni. Eitt af því sem við getum gert strax er að skapa aðstöðu fyrir íbúa til að vinna lífrænan úrgang til moltugerðar og til að rækta eigin matjurtir með því að útbúa matjurtagarða til ræktunar sem standi þeim til boða sem vilja og leggja þeim til þau verkfæri sem nauðsynleg eru. Slíkt mætti einnig tengja við skólagarða og Vinnuskóla. Þannig getum við auðveldað íbúum matvælaöflun sem er mikilvægt í ljósi þeirrar gífurlegu kaupmáttarrýrnunar sem heimilin hafa orðið fyrir, nýtt hreinleika landsins og jarðargróðurs betur og stuðlað að varðveislu þekkingar á ræktun, sparað gjaldeyri, samnýtt verkfæri og sparað eldsneyti við að koma matvælum á milli staða. Síðast en ekki síst er líka gaman að koma saman, kynslóð með kynslóð við að yrkja landið, skiptast á þekkingu og hjálpast að við að tryggja uppskeru í hús og njóta svo ávaxtanna af samveru og útiveru sumarsins.Jóhann Hannibalson og Sigurður Guðmundur Sverrisson er frambjóðendur K- lista Bæjarmálafélags Bolungarvíkur.

Stefnuskráin

Stefnuskrá Bæjarmálafélagsins

Bæjarmálafélagið - Forgangsmál

—  Atvinna:  Við viljum atvinnu fyrir alla, stöðugt, framsækið og fjölbreytt atvinnulíf

—  Þekking:  Við viljum að samfélagið okkar verði þekkingarsamfélag og hugað sé að menntun allra íbúa

—  Velferð: Við viljum að tekið sé tillit til þarfa allra íbúa

—  Ábyrgð: Við viljum ábyrga, gegnsæja og heiðarlega stjórnsýslu– allt upp á borð!

   

Ávarp oddvita Ketils Elíassonar.

 

Ágætu bæjarbúar.

Nú eru það kosningarnar. Bæjarmálafélagið hélt forval um síðustu mánaðarmót þar sem 20 einstaklingar tóku þátt. Þar hlaut ég fyrsta sæti og vil ég þakka öllum þeim fjölmörgu sem kusu í forvalinu það traust sem þeir sýndu mér með þessum hætti.

Á lista Bæjarmálafélagsins kemur saman mjög breiður hópur einstaklinga úr mörgum atvinnugreinum. Þar má nefna sjómenn, tölvufræðinga, heilbrigðisstarfsmenn, bankamann, bændur og ekki síst, húsmæður. Í hópnum hefur myndast gott samstarf, það sá ég mjög vel þegar ég kom heim á mánudaginn úr sautján daga ferð um Noreg.  Þó að efsta manninn vantaði, vann hópurinn af fullum krafti að undirbúningi kosninganna. „það kemur maður í manns stað.“

Bæjarmálafélagið stendur fyrir félagshyggju. Það má sjá í stefnuskrá okkar. Peningar eru ekki alltaf í fyrsta sæti hjá okkur. Lífsgleði, jöfn tækifæri og sú staðreynd að maður er manns gaman er okkar sannfæring. Ég verð þó að benda á eina staðreynd í sambandi við fjármálastjórn bæjarins þar sem Sjálfstæðisflokkurinn hefur farið með völd. Í skýrslu „hundraðdaganefndarinnar,“ á bls. 74, kemur fram að miðað við rekstur bæjarins árið 2005, hefði það tekið 2432 ár að greiða upp skuldir bæjarins miðað við að ekkert hefði verið framkvæmt á þeim tíma. Látum ekki fyrrverandi eða núverandi bæjarstjóra telja okkur trú um að þeir einir kunni að fara með peninga eða að lífið snúist fyrst og fremst um peninga.

Ég kalla mig oft sægreifa. Bolvíkingar geta verið stoltir af sínum sjómönnum sem hafa raðað sér í efstu sæti á listum yfir aflahæstu smábátasjómenn landsins mörg undanfarin ár. Sama má segja um bændur, sem hafa náð yfir 20 kg. fallþunga á meðan landsmeðaltalið er um og innan við 15 kg! Og allir sjá að ferðamannaiðnaðurinn er að taka hressilega við sér. Það er líka aðdáunarvert að sjá að fiskvinnsla var stórefld og fólki fjölgað strax eftir hrun.  En hrunið náði þó til okkar og felldi rækjuna. Því er það aðalverkefni nýrrar bæjarstjórnar og bæjarbúa að efla atvinnulífið. Mörg tækifæri felast í sjónum, td. eldi, ræktun og veiðum á ýmsum tegundum sem ekki eru nýttar í dag.

Bolvíkingar, horfum björtum augum til framtíðar, nú þegar göngin fara að opnast. Tækifærin eru hér, nýtum þau!

Kveðja, Ketill Elíasson.

  

Bæjarmálafélagið – atvinnumál

Okkar áherslur:

—  Atvinnu- menningar og markaðsráðgjafi verði ráðinn til bæjarins

—  Atvinnumálaráð verði endurvakið og atvinnumál skilgreind sem eitt af forgangsverkefnum næstu ára

—  Klasasamstarf. Unnið verði að því að tengja atvinnurekendur á líkum og ólíkum vettvangi betur saman með það að markmiði að skapa ný atvinnutækifæri.

—  Frumkvöðlasetur. Aðstaða til atvinnusköpunar verði komið á fót, frumkvöðlasetur í samvinnu við heimamenn og opinbera aðila.

—  Hugmyndasamkeppni. Hrint verði af stað árlegri hugmyndasamkeppni um atvinnusköpun, þjónustu- og vöruþróun í Bolungarvík í samstarfi við viðskipta- og listaháskóla.

—  Brimbrjóturinn verði kláraður og umhverfi hafnarsvæðis og aðstaða sjófarenda verði til fyrirmyndar

—  Möguleikar til atvinnuuppbyggingar vegna þjónustu við úthafssiglingar verði skoðaðir í tengslum við nýja siglingaleið um Norður -Íshaf.

—  Áætlunarferðir  verði efldar á milli Ísafjarðar og Bolungarvíkur til að auðvelda atvinnu- og skólasókn og ferðaþjónustu.

—  Alþjóðaflugvöllur. Við viljum alþjóðlegan flugvöll á Vestfirði: „Flytjum inn ferðamenn – flytjum út framleiðslu”.

Bæjarmálafélagið - velferðarmál

Við viljum að:

—  Heimaþjónusta verði tryggð í samræmi við þarfir fjölskyldna og einstaklinga

—  Læknir og hjúkrunarfræðingur verði staðsett í Bolungarvík

—  Skipaður verði starfshópur vegna yfirfærslu málefna fatlaðra til sveitarfélagsins.  Við styðjum framkomnar tillögur um byggðasamlag og viljum að skammtímavistun verið staðsett í Bolungarvík.

—  Mótuð verði fjölskyldustefna fyrir sveitarfélagið sem taki mið af fjölbreytni íbúa með það markmið að Bolungarvík verði besti bærinn fyrir allt fjölskyldufólk.

—  Hafin verði vinna við undirbúning á flutningi öldrunarþjónustu til sveitarfélaga og leitað leiða til að mæta einstaklingsbundnum þörfum aldraðra.

—  Opnunartími Íþróttamiðstöðvarinnar Árbæjar verði endurskoðaður með það markmið að bæta þjónustu við íbúa og ferðafólk og lokið verði við gerð sundlaugargarðs.

—  Heilsubæjarverkefnið verði stutt til heilla fyrir alla íbúa.

—  Að allir einstaklingar bæjarins hafi jöfn tækifæri til að njóta sín í samfélaginu.

 

Bæjarmálafélagið - menningarmál

Við viljum að:

—  Tryggður verði rekstur hins glæsilega og endurnýjaða félagsheimilis Bolvíkinga.

—  Gerð verði áætlun um safna- og menningarmál til næstu fjögurra ára.

—  Veittur verði markviss stuðningur og hvatning við frjáls félagasamtök.

—  Stutt verði við þær menningarhátíðir sem byggðar hafa verið upp og hvatt til nýsköpunar í menningarmálum.

—  Hugað verði að varðveislu gamalla mynda húsa og annarra menningarminja í sveitarfélaginu

—  Ósvörin verði gerð enn eftirsóttari þegar hún fer úr alfaraleið með bættri aðstöðu og uppbyggingu til framtíðar

—  Tryggð verði starfssemi Listasmiðju Bolungarvíkur.

—  Gerður verði glæsilegur minnisvarði til heiðurs Þuríði – þessari kyngimögnuðu konu sem braut hér land til búsetu og seiddi fisk í miðin svo Bolvíkingar gætu átt hér gott líf og lífsviðurværi um ókomin ár.

Bæjarmálafélagið - fræðslu- og æskulýðsmál

Vil viljum að:

—  Stjórnun grunn- og tónlistarskóla Bolungarvíkur verði sameinuð með það að markmiði að ná hagræðingu í rekstri og til að efla tónlistarnám barna.

—  Leikskólinn verði allur fluttur í Lambhaga og öllum ársgömlum börnum tryggð leikskólapláss.

—  Komið verði upp útiskólasvæði fyrir grunn- og leikskóla í Lambhaga.

—  Mótuð verði skólastefna fyrir alla aldurshópa.

—  Tómstunda –, æskulýðs- og forvarnarstarf verði eflt í samstarfi við Félagsmiðstöðina Tópas og frjáls félagasamtök.

—  Komið verði upp nettengdri námsaðstöðu fyrir fullorðna fjarnemendur.

—  Starfssemi Fræðaseturs Háskóla Íslands í Bolungarvík og Náttúrustofu Vestfjarða verði efld.

—  Séð verði til þess að reglulega verði boðið upp á námskeið fyrir fullorðna í bæjarfélaginu s.s. í tungumálum, tölvutækni, átthagafræði, listum og menningu, atvinnusköpun o.fl.

Bæjarmálafélagið - umhverfismál

Vil viljum:

—  Að unnið verði að aðild Bolungarvíkur að Staðardagskrá 21, - skilum jörðinni betri til komandi kynslóða en við tókum við henni.

—  Gera Bolungarvík að grænum bæ með aukinni trjá- og plönturækt á opnum svæðum í samvinnu við félagasamtök.

—  Efla grasagarð norðlægra plantna í Bolungarvík í samstarfi við Náttúrustofu Vestfjarða og taka þannig þátt í að varðveita genamengi heimsins.

—  Leita leiða til að breyta fiskúrgangi í nýtanlega afurð.

—  Að hreinsunardagar verði gerðir árvissir að vori og átak gert í tiltekt og fegrun bæjarins.

Bæjarmálafélagið – stjórnsýsla

Við viljum að:

—  Auglýst verði eftir framkvæmdastjóra bæjarfélagsins.

—  Laun bæjarstjóra verði endurskoðuð í takt við breytta tíma.

—  Að Bolungarvík verði áfram sjálfstætt sveitarfélag.

—  Haldnir verði íbúafundir reglulega til að auka lýðræði með því að gefa bæjarbúum kost á að vera virkir þátttakendur í mótun samfélagins – bæjarmálin eru sameiginlegt verkefni bæjarbúa!

—  Heimasíða bæjarins verði jafnan virk og upplýsandi.

—  Haldnir verði reglulegir fundir bæjarstjóra með forstöðumönnum stofnana bæjarins.

—  Bæjarstjórn eigi reglulega fundi með forstöðumönnum fyrirtækja.

—  Auglýstir verði viðtalstímar allra bæjarfulltrúa til að tryggja gott aðgegni að  stjórnendum bæjarins.

—  Þessi vinnubrögð tryggja okkur ábyrga fjármálastjórn!

 

Bæjarmálafélagið - gildi og framtíðarsýn

       Bæjarmálafélagið vill:

       Að stjórnun bæjarins grundvallist á þeim gildum sem sett voru fram á Þjóðfundinum sem haldinn var 2009. En þau eru meðal annars:

                        Heiðarleiki               Réttlæti

                        Virðing                      Ábyrgð

                        Lýðræði                     Mannréttindi

                        Kærleikur                  Jákvæðni

                        Bjartsýni                    Traust

                        Menntun                   Sjálfbærni

 

Að samfélagið í Bolungarvík verði þekkt fyrir samheldni, virðingu, vinnusemi, tækifæri, fjölbreytni og gleði!

      

Gefum okkur öllum tækifæri til framtíðar!

  

Xk.blog.is

Facebook.com/Bæjarmálafélag Bolungarvíkur

Kosningaskrifstofa: Höfðastígur 6 415 Bolungarvík

Netfang: [e-mail]

  

 

OPIÐ BRÉF TIL BOLVÍKINGA

Ágætu Bolvíkingar,

Senn líður að  lokum kjörtímabilsins. Með þessu bréfi viljum við undirrituð, bæjarfulltrúar Bæjarmálafélagsins, þakka bæjarbúum samfylgdina þau fjögur ár sem við höfum setið í bæjarstjórn. Að leiðarlokum er rétt að líta aðeins yfir farinn veg og rifja upp það helsta á kjörtímabilinu.

Bæjarmálafélagið  sem stofnað var fyrir átta árum sem opin, lýðræðisleg, óflokkspólitísk stjórnmálahreyfing í Bolungarvík, afrekaði það  í sínum fyrstu kosningum að ná að jöfnu atkvæðum við Sjálfstæðisflokkinn sem ráðið hefur ferðinni í  Bolungarvík í rúm 60 ár. Árangurinn varð enn betri við síðustu kosningar en þá var Bæjarmálafélagið  í oddastöðu til að semja um meirihluta við þau tvö framboð önnur sem í boði voru. Úr varð  að Bæjarmálafélagið og þá mánaðargamalt „útbrotsframboð“  úr Sjálfstæðisflokknum, Afl til áhrifa,  sömdu um meirihluta við stjórn bæjarins. Samstarfið fór ágætlega af stað og hugur var í fólki að taka til hendinni í  bæjarmálunum. Aðferðirnar voru nýjar og mætti helstar nefna:

• Opið upplýsingastreymi, Fréttabréf
• Íbúaþing, lýðræðislegar ákvarðanatektir
• Útsendingar á bæjarstjórnarfundum
• Skapa jákvæðar fréttir
• Bjartsýni og uppbygging
• Sókn á ríkisvaldið til leiðréttingar á ýmsum ósanngjörnum leikreglum.

 

Sprungið  samstarf

En Adam var ekki lengi í Paradís. Óþarfa athafnasemi eins okkar (Soffíu Vagnsdóttur) í tengslum við mögulega atvinnuuppbyggingu og þá tekjuaukningu til bæjarins varð til þess að meirihlutinn sprakk eins og þið þekkið flest og ekki verður rakið frekar hér. Þó er rétt að staðfesta að ætlaðir hagsmunaárekstrar bæjarfulltrúans og bæjaryfirvalda sem urðu ástæða samstarfsslitanna hafa enn ekki litið dagsins ljós svo þær áhyggjur voru óþarfar. Verkefnið hefur hins vegar gengið með ágætum og er nú að mestu lokið. Þetta er auðvitað hinn mesti og vandræðalegasti brandari og forsvarsmönnum A-lista til mikillar hneisu. En nóg um það.

Sama gamla...

Uppsveiflan sem fylgdi starfsháttum Bæjarmálafélagins dofnaði því miður verulega með meirihlutaslitunum. Deyfð tók við og fremur aumt ástand og sögur fóru að berast þess efnis að Bæjarmálafélagið  hefði á þeim stutta tíma sem það var í forsvari, náð að setja fjámálin á annan endann og knúið  hinn nýja meirihluta til að leita á náðir Eftirlitsnefndar sveitarfélaga. Það má kokka úldinn fisk með ýmsu kryddi til að reyna að plata bragðlaukana. En hafa skal það sem sannara reynist. 

Í bréfi frá Jóhannesi Finni Halldórssyni starfsmanni Eftirlitsnefndar með fjámálum sveitarfélaga til Bolungarvíkurkaupstaðar, dagsettu 22. október 2007 segir orðrétt:

„Í samræmi við ákvæði VI. kafla sveitarstjórnarlaga, nr. 45/1998, og reglugerðar, nr. 371/2001, hefur eftirlitsnefnd með fjármálum sveitarfélaga athugað ársreikning Bolungarvíkurkaupstaðar fyrir árið 2006. Þá hafa átt sér stað viðræður við bæjaryfirvöld vegna fyrri athugana og fjármál bæjarins verið til athugunar hjá nefndinni.

Eftirlitsnefnd með fjármálum sveitarfélaga vil lýsa ánægju sinni með jákvæða þróun í fjármálum sveitarsjóðs Bolungarvíkurkaupstaðar, sem koma fram í ársreikningi 2006“.  (tilvitnun lýkur). 

Þetta kom nokkuð  á óvart þar sem við töldum stöðuna með engu móti ásættanlega og því ritaði þáverandi bæjarstjóri Grímur Atlason svarbréf til Eftirlitsnefndar sem dagsett er 2. nóvember 2007 þar sem kynnt var m.a. bókun bæjarráðs. En þar segir m.a:

„Bæjarráð fagnar þessum árangri en mun óska eftir skýringum á því hvar þessi jákvæða þróun liggur og frekari ráðgjöf í þeim efnum.

Ljóst er að sveitarfélagið hefur selt umtalsvert af eignum sl. misseri auk þess sem framlag frá  Jöfnunarsjóði hækkaði umtalsvert á síðasta ári með tilkomu 700 m.kr. aukaframlags. Í ár er framlag Jöfnunarsjóðs 21% minna úr 1400 m.kr. aukaframlagi. Eignir er ekki hægt að  selja aftur og því vandséð hvernig fylgja á þessari jákvæðu þróun eftir án þess að draga enn frekar úr framkvæmdum og viðhaldi sem hefur þó verið í lágmarki. 

Um leið  og við fögnum því að  eftirlitsnefndin álíti að við  séum á réttri leið óskum við  eftir skýringum í hverju þessi jákvæða þróun felst. Það væri ágætt að  fá frekari leiðbeiningar þannig að  við getum haldið áfram á þeirri braut“.  (tilvitnun lýkur). 

Af þessu sést að  samstarf við Eftirlitsnefnd hófst ekki með tilkomu núverandi meirihluta bæjarstjórnar, það var þegar hafið í  ljósi erfiðrar stöðu sem löngu var öllum ljós sem vildu vita. 

Betri staða  – en hve lengi?

En nýjustu tölur úr bæjarbókhaldinu bera vitni um að fjárhagurinn sé  loks eitthvað upp á við. 

Helstu ástæður þess eru:

1. Hækkun vegna 10% aukaútsvars kr. 28 milljónir króna.
2. Útsvarstekjur af starfsmönnum vegna samnings Kjarnabúðar og Ósafls kr. 25 milljónir.
3. Hækkun fasteignagjalda 5 milljónir.
4. Niðurfelling skulda í Sparisjóði Bolungarvíkur 15 milljónir.
5. Framlag frá jöfnunarsjóði til  vegna félagslegs húsnæðiskerfisins, 66 milljónir.
6. Afskriftir skulda vegna félagslega Íbúðakerfisins kr. 70 milljónir.
7. Lækkun fjármagnskostnaðar 48 milljónir.
8. Lækkun heildarlauna, uppsagnir starfsfólks og hagræðing í stofnunum bæjarins,

11 milljónir.

1. Uppgjör vegna gjaldþrots Einars Guðfinnssonar hf. Kr. 15, 8 milljónir.

 

Þetta eru í megindráttum þær ástæður helstar fyrir því að viðsnúningur hefur orðið  í rekstri bæjarins, Ekki verður séð hvernig hægt er að þakka meirihlutaskiptum vorið 2008 þetta. Því línurnar voru þegar lagðar af meirihlutanum undir stjórn Gríms Atlasonar þegar leitað var til ríkisins eftir áheyrn.  Það eru því engin undraverð afrek sem núverandi meirihluti hefur náð í rekstri bæjarins. Staðreyndin er sú að loks fékkst áheyrn hjá ríkisvaldinu um leiðréttingu óásættanlegrar stöðu sem barist hefur verið fyrir um árabil vegna félagslega íbúðakerfisins auk uppsafnaðs skuldavanda vegna fyrri tímabila. Þá hafa íbúar tekið á sig miklar álögur og um leið þurft að sætta sig við minni þjónustu.

Íbúar í sveitarfélaginu munu fá sendan reikninginn vegna 10% aukaútsvars núna 1. ágúst enda var ekki gert ráð fyrir  honum í staðgreiðslu á  árinu 2009.

Benda má á  greinar sem við höfum birt varðandi málefni bæjarins á  kjörtímabilinu.

http://www.bb.is/Pages/26?NewsID=141107

http://www.bb.is/Pages/82?NewsID=121356

http://www.bb.is/Pages/82?NewsID=126168

http://www.bb.is/Pages/82?NewsID=95311  

En nú  er það framtíðin 

Bæjarmálafélagið  býður nú fram í þriðja sinn í Bolungarvík. Áfram eru það sömu gildin og vinnubrögðin sem viðhöfð eru; allir eru hjartanlega velkomnir til þátttöku, þeir sem áhuga hafa á að vinna að málefnum bæjarins á sveitarstjórnarstiginu setja nafn sitt í pott og ÖLLUM bæjarbúum er síðan gefinn kostur á að raða upp þeim lista sem kosið er um í bæjarstjórnarkosningum.

Nú hefur listinn litið dagsins ljós. Við erum afar stolt af þeim hópi sem nú tekur við hlutverki okkar. Þetta er upp til hópa fólk sem ber hag heimabæjar síns fyrir brjósti og er tilbúið til að leggja mikið á sig fyrir hann með heiðarleika, velvild, sanngirni og jákvæðni að leiðarljósi. Flokkspólitík hefur aldrei truflað starf Bæjarmálafélagsins. Þar vinna allir á sömu forsendum. Nú fer í hönd snörp kosningabarátta sem við vonum að verði heiðarleg og byggi á gildum Bæjarmálafélagsins, sanngirni og heiðarleika og virðingu fyrir mismunandi skoðunum og ólíkum bakgrunni. Hvernig svo sem allt fer þá fá íbúar Bolungarvíkur það sem þeir vilja með vali sínu. Hér verður annars vegar valið um gamlar hefðir, hugmyndafræði sem segja má að hafi siglt í strand með hruninu og hins vegar virkt lýðræði, opna umræðu, áræði, sanngirni, heiðarleg vinnubröð og trú á framtíð byggðarlagsins. Við eigum að hlúa að því sem gott er en sýna djörfung til breyta því sem þarf að breyta fyrir réttlátt og sanngjarnt samfélag.

Við viljum að  lokum þakka öllum þeim sem við höfum átt gott samstarf við  og unnið hafa fyrir hönd Bæjarmálafélagsins í nefndum og ráðum og á hinum ýmsa vettvangi. Við þökkum einnig starfsfólki á bæjarskrifstofu fyrir gott samstarf og fyrrverandi bæjarstjóra Grími Atlasyni fyrir einstaklega gott samstarf og vinnu í þágu Bolungarvíkur þann, því miður alltof stutta tíma sem hans naut við. 

Við hvetjum ykkur kæru Bolvíkingar til að spyrja spurninga, vera gagnrýnin, leita sannleikans og kynna ykkur mál. Þannig og aðeins þannig verður til heilbrigð umræða sem byggð er á  þekkingu og víðsýni.

Bæjarmálafélagið  býður ykkur velkomin á kosningaskrifstofuna á Höfðastígnum. Þar er alltaf líf og fjör.

•  
  •  
    •  
      •  
        •  

               Bolungarvík 16. maí 2010

•  
  •  
    •  
      •  
        •  

               Bestu kveðjur,

•  
  •  
    •  
      •  
        •  

               Soffía Vagnsdóttir, fráfarandi oddviti Bæjarmálafélagsins

•  
  •  
    •  
      •  
        •  

               Gunnar Hallsson, bæjarfulltrúi

•  
  •  
    •  
      •  
        •  

               Jóhann Hannibalsson, bæjarfulltrúi

•  
  •  
    •  
      •  
        •  

               xk.blog.is      facebook.com/Bæjarmálafélag Bolungarvíkur

Er hægt að af-fatla umhverfið?

 Hvað gerir mannesku fatlaða? Hvað er það sem segir að hún sé fötluð? Hvað er fötlun? -Fötlun felst í því að lifa við einhverskonar takmarkanir í daglegu lífi. Í raun erum við öll fötluð á einhvern hátt. Við getum td. ómögulega málað þakið á húsunum okkar án hjálpartækja. Það mætti líta á það sem fötlun. Við getum ekki skipt um ljósaperu í götuljósum án stiga eða annars útbúnaðar. Er það ekki líka fötlun? Að vera fatlaður er í raun ekki stærsta vandamál okkar, það er umhverfið. Hvernig það tekur á fötlun okkar. Ergo: hversu fatlað er umhverfi okkar?Ef manneskja er í hjólastól eða með göngugrind, þá eru stigar mikil fötlun. Ef manneskja er sjónskert þá er löskuð gangstétt fötlun. Ef manneskja er heilabiluð þá er umhverfi sem ekki miðar að þörfum þess hennar, mikil fötlun. Ef manneskja er einhverf, þá er óreiðukennt umhverfi alveg hrein súperfötlun fyrir viðkomandi. Og það má jafnvel ganga enn lengra. Fyrir manneskju eins og mig, er há eldhúsinnrétting agalega fötluð.  Pínulitlar buxnastærðir eru gífurlega fatlaðar! Ég held að við getum flest verið sammála um að fyrir þá, sem teljast „fatlaðir,“ er það umhverfið sem er í raun fatlað.  Hindranir hins „fatlaða“ eru í umhverfinu.  Til að hnykkja á því, set ég hér eftir gæsalappir um orðið „fatlaður.“Nú eru málefni „fatlaðra“ að færast yfir á sveitarfélög frá ríkinu. Í því eru falin mikil tækifæri fyrir okkur til að efla og bæta þjónustu við „fatlaða“ og ekki síst fjölskyldur þeirra. Tækifærin eru aðalega fólgin í því að „af-fatla“ umhverfi þeirra einstaklinga sem einhverra hluta vegna búa við fatlað umhverfi.  Að tryggja að „fatlaðir“ og fjölskyldur þeirra búi við sömu lífsgæði og við sem teljum okkur ófötluð,  gerum.  Að tryggja að við öll búum við sjálfsögð lífsgæði. Eins og þau að geta farið ferða okkar. Að geta notið frístunda okkar. Að tekjur okkar dugi fyrir öllum lífsnauðsynjum. Að við höfum trygga búsetu. Að við höfum einstaklingsmiðaða þjónustu.  Það er hægt að halda endalaust áfram en ég læt upptalningunni lokið hér, á þessu sjálfsögðu mannréttindum.Svæðisskrifstofa um málefni fatlaðra á Vestfjörðum hefur unnið sérstaklega vandað starf á undanförnum árum og hefur mjög gott hlutfall starfsfólks sem hefur menntað sig á einhvern hátt í þessum þjónustugeira. Það þýðir að við höfum hér marga starfsmenn á þessu sérsviði sem nauðsynlegt er að halda í. Þekkingin og reynslan má ekki glatast okkur. Það verðum við að tryggja til að stuðla áfram að „af-fötlun“ umhverfisins. Hætt er við því að við tilfærsluna skapist óreiðukennt ástand sem rýrir þjónustuna að einhverju marki til að byrja með. Það er í okkar höndum hversu mikil eða lítil þessi rýrnun verður. Því betur sem við erum undirbúin,  þess minni hætta skapast. Þjónusta við fatlaða er góð hér, en hún má samt aldrei við því að versna. Ekki um millimeter! Hún á alltaf að batna. Markmiðin á að setja hátt. Og hækka stöðugt! Mannauður. ) þetta er merkilegt nýyrði, sem skyndilega er allsráðandi í tungumáli okkar og mörg okkar kannski tæpast vitum hvað merkir? ) -er dýrmætastur af öllu.  Mannauður er að mínu viti eitt af fallegustu orðunum á íslenskri tungu. Í því felst nefnilega bæði fegurð, þekking og viska, fjölbreytni og sérstaða hvers einstaklings sem er hluti af órofa heild.Menn mega hreykja sér á hverju sem er og öllu fögru má lofa. En aðeins þeir sem eru trúir félagshyggjunni,  skilja mikilvægi hvers einstaklings, hvort sem umhverfi hans er fatlað eða ófatlað, sama hversu gamall hann er, óháð því hverrar þjóðar hann er, aðeins þeir skilja hvað felst í hugtakinu mannauður. Veit hve mikilvægt það hugtak er og vinnur í þágu þess.Aðeins á þann hátt sýnum við ábyrgð. Samfélagslega ábyrgð.Ylfa Mist Helgadóttir. Höfundur skipar 3. Sæti á lista Bæjarmálafélagsins í Bolungarvík. 

Atvinnumálin í forgang.

Nú líður senn að því að ibúar Bolungarvíkur gangi að kjörborðinu og taki ákvörðum um hvað af tveimur framboðum þau kjósa til forystu í bæjarfélaginu. Sjálfstæðismenn klifa á því að í sveitarfélaginu þurfi að vera ábyrg fjármálastjórn og fara með staðlausar dylgjur um að 18 mánaða forysta K-lista Bæjarmálafélags Bolungarvíkur og A- lista Afls til áhrifa á síðasta kjörtímabili hafi farið með fjármál bæjarins á kaldan klaka. Látið ekki telja ykkur trú um aðra eins vitleysu. Grunnurinn að fjárhagserfiðleikum bæjarins er löng valdatíð Sjálfstæðisflokksins en sá flokkur hefur farið með meirihluta í bænum síðustu sex áratugi.

Á þeim tíma náðu menn að safna upp skuldum þrátt fyrir velmegunar ár í atvinnulífi og sölu á eignum bæjarbúa í arðsömum fyrirtækjum eins og Orkubúi Vestfjarða og velta menn því fyrir sér hvert þeir fjármunir hafi farið miðað við skuldastöðu sveitarfélagsins! Er kannski komið af því að fá rannsóknarnefnd til að fara ofan í saumana á þeim málum? Á þessum stutta valdatíma okkar óskuðum við eftir aðstoð og ráðleggingum eftirlitsnefndar sveitarfélaga til að leita úrræða til að taka á erfiðri skuldastöðu sveitarfélagins sem var afleiðing stjórnunar undanfarinna kjörtímabila og fengum reyndar hrós fyrir árangur í fjármálum frá nefndinni og það starf er að skila árangri nú með niðurfellingu skulda, auknu framlagi frá jöfnunarsjóði og reyndar áhrifa af auknum útsvarstekjum sem eru ekki síst að þakka þeim Bolvíkingum sem auðnaðist að semja um verktöku á þjónustu við erlenda starfsmenn í jarðgangnagerð Bolungarvíkurganga og tryggja þannig atvinnu og skatttekjur af dvöl þeirra í bænum. Bent er á að hafnar hafi verið framkvæmdir við sundlaugargarðinn og félagsheimilð í valdatíð okkar. Það er rétt og við erum stolt af því!

Þessir staðir hafa veitt okkur og munu áfram veita okkur innblástur og gleðistundir því að þetta eru samkomustaðir bæjarbúa til að hittast og eiga góðar stundir með samborgurunum, fjölskyldum og vinum. En heiðurinn eigum við þó ekki alveg ein því að ALLIR bæjarfulltrúar samþykktu að fara út í framkvæmdir við félagsheimilið og núverandi bæjarstjóri tók meira að segja að sér formennsku byggingarnefndar. Í þeirri formennsku fólst líka að leita leiða til að tryggja utanaðkomandi, þolinmótt fjármagn til verksins. Ef Bolvíkingar eiga að vilja að búa og starfa í sveitarfélaginu þarf að tryggja íbúum aðstöðu eins og kostur er í samræmi við óskir þeirra og vilja og ég hygg að við allir bæjarbúar séum sammála um að sinna þurfi þessum félagslegu þáttum enda þurfum við á því að halda að koma og gleðjast saman ekki síst núna þegar harðnar á dalnum í íslensku samfélagi. Það er ágætt að rifja upp heilræði hávamála í þessu sambandi um nauðsyn þess að koma og hlæja saman en fals og lygi fær sá í bakið aftur er hana stundar:

Vin sínum
skal maður vinur vera
og gjalda gjöf við gjöf.
Hlátur við hlátri
skyli höldar taka,
en lausung við lygi.

Það gleymist þó í allri umræðunni um fjármálin að grunnurinn að því að hafa tekjur til að framkvæma og greiða niður skuldir er að hafa fjölbreytt og stöðugt atvinnulíf. Því höfum við því miður ekki átt til að dreifa og höfum þurft að upplifa hvert áfallið af öðru á undanförnum árum með þeirri sársaukafulllu reynslu sem íbúar verða fyrir með atvinnumissi. Við í Bæjarmálafélaginu viljum leita allra leiða til að efla fjölbreytni í atvinnulífi , því að það gengur ekki að setja öll eggin í sömu körfuna. Við viljum nýta stoðkerfi atvinnulífs miklu meira en nú er gert, setja á laggirnar frumkvöðlasetur með aðstöðu fyrir einstaklinga með viðskiptahugmyndir, ráða atvinnu- og markaðsfulltrúa til bæjarins, endurvekja atvinnumálaráð, hvetja til nýsköpunar í sjávarútvegi og öðrum atvinnugreinum, efla samstarf fyrirtækja og skilgreina atvinnumál sem eitt aðalforgangsverkefni sveitarfélagsins á næsta kjörtímabili. Því aðeins með heilbrigðu, fjölbreyttu og stöðugu atvinnulífi getum við tryggt Bolvíkingum gott samfélag á komandi árum. Með samstilltu átaki getum við snúið vörn í sókn, sameinumst um að setja x við K á kjördag og kjósa þannig lýðræðisleg vinnubrögð, opna og gegnsæja stjórnsýslu og vilja og áræðni til að byggja upp heilbrigt og réttlátt samfélag.

Jóhann Hannibalsson, bæjarfulltrúi, skipar 2. sætið á framboðslista Bæjmálafélagsins K-lista í komandi sveitarstjórnarkosningum.

Hundraðdaganefndin...

Í dag (reyndar í gær, þegar þetta er ritað eftir miðnætti) fór ég í Ráðhúsið í Bolungarvík til að kynna mér niðurstöðu nefndar sem sett var á laggirnar til að vega og meta kosti sameiningu sveitarfélaganna hér á norðanverðum Vestfjörðum,  Bolungarvíkur, Ísafjarðarbæjar og Súðavíkur. Í stuttu máli, fannst mér ekkert annað hafa komið útúr þessari hugmyndavinnu í raun, annað en stór greiðsla til ráðgjafafyrirtækis í Reykjavík. Skýrslan var ekki illa unnin, alls ekki. En ég gat alls ekki komið auga á að minn heimabær myndi hagnast á sameiningunni. Óskir íbúa um sitt nærumhverfi hljóta að vega þungt á metum og ég hef ennþá ekki talað við þann Bolvíking sem vill sameiningu.

Ég bar fram eina spurningu eftir skýrslukynninguna. Hún var svohljóðandi; "Það kom fram snemma í kynningunni að reynt yrði leitast við að treysta fjölbreytni atvinnu í byggðarlögum í kjölfar þess að störf yrðu færð til eða lögð niður. Ísafjarðarbær hefur þessa reynslu eftir að hafa sameinast Flateyri, Suðureyri og Þingeyri. Hvernig gekk það upp í því tilfelli? Var reynt að stuðla að atvinnufjölbreytni í hinum smáu bæjum eftir þá sameiningu? Og tókst það?"

Halldór Halldórsson, bæjarstjóri Ísafjarðarbæjar svaraði því til að engin störf hefðu horfið úr minni bæjunum á vegum stjórnsýslunnar nema störf sveitarstjóranna sjálfra. Nú er það hlutur sem ég þarf að kynna mér ítarlegar, sérstaklega í ljósi þess að síðar kom sú spurning úr sal hvort að bæjarstjórn Ísafjarðarbæjar hefði ekki ítrekað reynt að flytja Grunnskóla Flateyrar til Ísafjarðar og hann svarði því til að "það hafi einu sinni komið til tals en ekki hafi verið farið útí þær framkvæmdir vegna þess að það hafi m.a. mætt miklum mótbyr foreldra." (ég tek fram að þetta er ekki orðrétt, hvorki spurning mín, né svar bæjarstjóra Ísafjarðarbæjar, en þetta er engu að síður innihald hvors tveggja.)

Nú veit ég að þessi hugmyndavinna um lokun Grunnskólans á Flateyri og flutning skólabarna þaðan og yfir á Ísafjörð hefur mun oftar komið upp. A.m.k fjórum sinnum. Svar bæjarstjóra var því ekki allskostar rétt. A.m.k skildi ég það alls ekki þannig. Í ljósi þess held ég að það sé þarfaverk að kynna sér einnig hvort frekari skerðing hafi orðið á opinberum störfum í smærri byggðakjörnum Ísafjarðarbæjar eftir sameiningu fyrrgreindra sveitarfélaga.

Nú er ég hlynnt samvinnu þessara smáu sveitafélaga á norðanverðum Vestfjörðum, svo lengi sem hún bætir þjónustu og tryggir atvinnuöryggi íbúanna. En ég er engan veginn tilbúin til að ganga að lögformlegri sameiningu Bolungarvíkurkaupstaðar við Ísafjarðarbæ. Ég trúi því að við myndum alltaf koma til með að bera það skarðan hlut frá borð,i að hagræðingin sem kynnt var í dag uppá 24 m.kr. á ársgrundvelli, borgi sig fyrir framtíð íbúanna hér í Bolungarvík.

Ég vil að Bolungarvík verði áfram sjálfstætt sveitarfélag en að við getum samt unnið að uppbyggingu þjónustu í öllum bæjarfélögunum hér á Vestfjörðum með samvinnu! Ekki sameiningu! 

Bestu kveðjur,

Ylfa Mist Helgadóttir. Ég skipa 3. sæti á lista Bæjarmálafélags Bolungarvíkur.

Brynvarin og fílelfd...

... mættu þau Soffía Vagnsdóttir, Gunnar Hallsson og Jóhann Hannibalsson á Höfðastíginn í kvöld og tóku við spurningum frá afar vel sóttum fundi varðandi hinn mikla fjármála "viðsnúning," sem hefur verið tíðrætt um að undanförnu, m.a á vef Bæjarins Besta á Ísafirði. Þau gáfu fólki það sjálfsagða tækifæri að spyrja þau spjörunum úr um meint umsvif Soffíu á þeim tíma sem uppúr slitnaði í samstarfi A-listans og Bæjarmálafélaginu, framkvæmdirnar á Félagsheimilinu, sundlaugargarðinn, Vatnsveituframkvæmdirnar, peningamálin og hvernig á því stæði að meirihlutasamstarf þeirra hafi fengið á sig stimpil "óreiðu og fjármálasukks."

Fólk var ófeimið við að spyrja og skópust mjög líflegar umræður á fundinum sem var í alla staði verulega fræðandi og gagnlegur.

Fréttabréf

Nýtt fréttabréf hefur verið borið í hús. Þar koma fram þeir atburðir sem við viljum gjarnan að þið takið þátt í með okkur í komandi viku....

Skrár tengdar þessari bloggfærslu:

• Fréttabréf